1Jo 4 | YLE | STEP | A tîdê mbwó yoo, pi knî ye módó namê kêlîmî, ngmênê dmyinê myeme dé. Ghê dmi n꞉ii mbêmê nmye a mbumu nyédi, myedmyinê myeme dé, mu kópu u dîy꞉o pi yilî knî y꞉oo Chóó Lémi u komo k꞉omo ngê a kapî ngópu. Yi yéli daa Chóó Lémi u Ghê Dmi mbêmê a mbumu nyédi, kn꞉aa ghéni dmi mbêmê a mbumu nyédi.

1 John 4

Ghê dmi myeme u kópu dyuu

1 A tîdê mbwó yoo, pi knî ye módó namê kêlîmî, ngmênê dmyinê myeme dé. Ghê dmi n꞉ii mbêmê nmye a mbumu nyédi, myedmyinê myeme dé, mu kópu u dîy꞉o pi yilî knî y꞉oo Chóó Lémi u komo k꞉omo ngê a kapî ngópu. Yi yéli daa Chóó Lémi u Ghê Dmi mbêmê a mbumu nyédi, kn꞉aa ghéni dmi mbêmê a mbumu nyédi. 2 Ala kópu mbêmê dmyinê myeme dé. N꞉ii ngê choo tpapê knomomê, Nmî Mî Tp꞉oo Yesu Kédisu ndêndê ngê pi ntee pi ngê pyodo, yi pini Chóó Lémi u Ghê Dmi mbêmê a mbumu yédi, 3 ngmênê n꞉ii ngê yi kópu Yesu p꞉uu d꞉uudpî vyi, yi pini daa Chóó Lémi u Ghê Dmi mbêmê a mbumu yédi. Ghéni dmi n꞉ii mbêmê a mbumu yédi, yi ghéni dmi Yesu Kédisu p꞉uu a d꞉uu yédi. Yi kópu u pi wunê nmyinê ny꞉ee ngópu, nmyepê, Dîyo wa t꞉aa. Ala ngwo nmî vy꞉o wunê ka m꞉ii.

4 A tp꞉ee yoo, nmyo nmî Mî u yoo ndêndê, yi yéli yi pwo nmyi lee dniye, mu kópu u dîy꞉o ghéni dmi n꞉ii nmyi mênê a tóó, u wêdêwêdê ndîî, wo yéli yi mênê n꞉ii a tóó, têdê. 5 Dyámê u kópu knî yi p꞉uu a mbumu nyédi, yoo ye dpî ng꞉aa mbê dmi, mu kópu u dîy꞉o yi nuw꞉o dmi dyámê mbêmê a wee. 6 Ngmênê nmo nmî Mî u yoo. N꞉ii u lama nmî Mî a tóó, nmo wunê ng꞉aa yédi. N꞉ii u lama nmî Mî daa tóó, nmo dêwunê ng꞉aa yédi. Yi kópu knî yi mbêmê ghê dmi dê nmo myeme doo, woni ndê kópu dé yi ghéni dmi, woni k꞉omodanê kópu dé yi ghéni dmi. - 1 Mátiyu 24꞉11* - 2 1 Kódin 12꞉3* - 3 2 Njon 1꞉7* - 5 Njon 15꞉19* - 6 Njon 8꞉47*

Nmî Mî nódo nmî nuu ghi dmi a tóó

7 A tîdê mbwó yoo, nmî nuu ghi dmi numo nódo dny꞉oo ya, mu kópu u dîy꞉o nmî Mî ngê vyîlo yi kópu u yi u ngwo ye kwo. Pini n꞉ii nódo yoo yi nuu ghi dmi a tóó, nmî Mî tp꞉oo ngê dpî pyódu, nmî Mî u lama a ya yédi, nmî Mî wunê nj꞉ii ngê. 8 Pini n꞉ii nódo yoo yi nuu ghi dmi daa ya yédi, yi pini u lama nmî Mî daa tóó, nmî Mî dêwunê nj꞉ii ngê, mu kópu u dîy꞉o nmî Mî nódo nmî nuu ghi dmi ntênê a tóó. 9 Nmî lama a tóó, Nmî nuu ghi dmi nmî Mî nódo ntênê a tóó, mu kópu u dîy꞉o chóó Tp꞉oo mu ngmidi dyámê mbêmê a dy꞉ââ ngê, ghê kamî nmo yinê mînê kpo. 10 Nmî Mî nuu ghi nmî nódo dnyinté a tóó, ngmênê nmî nuu ghi dmi u nódo ntênê a tóó, Tp꞉oo nmo a dy꞉ââ ngê, nmî yikî dmi u pwo ghay wo.

11 A tîdê mbwó yoo, nmî nuu ghi dmi nmî Mî nódo dnyinté daa tóó, nmî nuu ghi dmi numo nódo yinté myedny꞉oo ya. 12 Pi ngmê ngê nmî Mî doo u kpêê, ngmênê nmî nuu ghi dmi numo nódo adî ya knomomê, ye nmî Mî nmî p꞉uu adî ya, u nuu ghi nmî nódo ntênê adî ya.

13 Nmî lama a tóó, Nmî Mî p꞉uu nmo pyede, myenté nmî p꞉uu mye t꞉a, mu kópu u dîy꞉o chóó u Ghê Dmi nmo a kpo. 14 Myenté pi yintómu yi l꞉êê dîy꞉o Tp꞉oo nmo a dy꞉ââ ngê, nmî Mbwámê ngê a pyódu ngê. Yi pini nmî chóó nmî módu, pi knî ye u pi u ngwo nmo tpapê ngê. 15 N꞉ii ngê dpo, Yesu nmî Mî Tp꞉oo, yi pini p꞉uu nmî Mî a ya yédi, myenté nmî Mî p꞉uu yi pini mye ya yédi. 16 Nmî lama a tóó, Nmî nuu ghi dmi nmî Mî nódo a tóó. Yi kópu p꞉uu nmî nuw꞉o dmi a kwo. Pini n꞉ii nódo yoo yi nuu ghi dmi adî ya, yi pini nmî Mî p꞉uu a ya yédi, myenté yi pini p꞉uu nmî Mî a ya yédi. 17 Pini n꞉ii ntênê yinté a tóó, kuwókuwó wéni ngê u kóté kîgha têdê daadî nkîngê, mu kópu u dîy꞉o Yesu Kédisu ntee a tóó, dyámê mbêmê yinté myeno pyede. 18 Nyââ, pini n꞉ii nódo yoo yi nuu ghi dmi a tóó, doo u ntââ daadî nkîngê. Pini n꞉ii nmî Mî ka a nkîngê yédi, yi pini nódo yoo yi nuu ghi dmi dnyinté a tóó, u kpadakpada p꞉uu a nuw꞉o yédi.

19 Yoo yi nuu ghi dmi nmî nódo a tóó, mu kópu u dîy꞉o nmî Mî nódo nmî nuu ghi dmi mwiyé doo a ya. 20 Pini n꞉ii ngê dê vyi knomomê, Nmî Mî nuu ghi a nódo a tóó, ngmênê yi pini ka u mbwó adî diya, yi pini k꞉omodanê pyu. U mbwó u nuu ghi nódo daadî ya knomomê, pini n꞉ii u kpêê, ye nmî Mî u nuu ghi nódo angênté amaa ya, pini n꞉ii doo u kpêê? 21 Yesu Kédisu ngê ala dêêpî kópu nmo a kpo, nmopê, N꞉ii nódo nmî Mî nuu ghi a tóó, u mbwó nuu ghi nódo myechoo ya. - 9 Njon 3꞉16* - 10 Lóma 5꞉8-10* - 11 Mátiyu 18꞉33* - 12 Njon 1꞉18* - 13 2 Kódin 1꞉21-22* - 14 Njon 3꞉17* - 16 Njon 6꞉69* - 19 1 Njon 4꞉10* - 21 Mátiyu 5꞉44-45, Mak 12꞉29-31*